पुणे प्रवाह न्युज पोर्टल
*...
*सयाजी शिंदे आणि अरविंद जगताप यांच्या सह्याद्री देवराई या उपक्रमात सहभागी व्हा... आणि अस्सल मराठी निसर्ग संस्कृती जपायला सहयोग करा...*
मित्रांनो......
शेकडो वर्षांपासून उन्हाच्या झळा सोसणारी माणसं आपण... हे सगळं उन फक्त झाडांच्या जीवावर सोसत आलोय आपण आणि आपले पूर्वज... त्यातही एका झाडाची सावली उन्हाळ्यात जास्तच गोड वाटते. बरोबर ओळखलं. आंब्याचं झाड. दुर्दैवाने नव्या पिढीला आंब्याच्या अस्सल देशी जाती माहितीही होत नाहीत. खायला मिळणे तर खूप लांबची गोष्ट. शेप्या, लालपरी, गोटीआंबा, रायवळ, खारीकआंबा, कागद्या, लोणच्या, केसर, शेंदरया, नारळया, बिटका, केळ्या, गाडग्या अशी कितीतरी नावं होती आपल्या लहानपणी. यातल्या ठराविक झाडाच्या कैऱ्यांचाच खार व्हायचा.
आता तुम्ही म्हणाल नारळया आणि खोबऱ्या एकच. पण नाही तसं नाही... नारळया आकाराने नारळाएवढा असतो. तर खोबऱ्या चवीला खोबऱ्यासारखा असतो. हे सगळं आपलं वैभव होतं. कमी तेल वापरून मुरलेला खार अजूनही जिभेवर आहे. त्याला सुटलेलं पाणी भाकरीला घोळसून खाण्यात काय मजा होती. या सगळ्या आठवणी राहिल्यात...
आपली संस्कृती जपायची म्हणजे निबंध नसतात जपायचे. किंवा मेसेज नसतात फॉरवर्ड करायचे. आपली अस्सल झाडं जपायची असतात. ती आपली आणि आपल्या मातीची खरी ओळख असते.
मग या महिन्यात जेवढ्या वेगवेगळ्या देशी आंब्याच्या कोयी गोळा करता येतील त्या करा. जपून ठेवा. सह्याद्री देवराईचे तुमच्या भागातले वृक्षमित्र त्या गोळा करण्याची जवाबदारी घेतील. अर्थात फक्त कोय द्यायची नाही. तिची माहिती द्यायची. कोय कोणत्या प्रकारची आहे? त्या आंब्याला तुमच्या भागात काय म्हणतात? आंबा कुणी लावला होता हे माहित असलं तर अधिक उत्तम. ज्याचं श्रेय त्याला द्यायला पाहिजे. आणि ही झाडं लावणाऱ्या माणसांची नावं जगाला कळायला पाहिजेत.
तर मित्रांनो, ही सगळी माहिती आणि कोय गोळा करा. तसेच तुमच्या मित्रांनादेखील ही माहिती पाठवा व यात सहभागी व्हायला सांगा.
*३० मे पर्यंत कोया गोळा करून, ८ जून पर्यंत त्या वाळवून, १२ जून पर्यंत खाली दिलेल्या नंबर वर आपल्या वृक्षप्रेमी मित्रांना संपर्क करा.*
का करायचं हे सारं? तर तुम्ही दिलेल्या कोयापासून आपण रोपे तयार करू या, ती वाढवू या आणि जपूया.
मित्रांनो... *भेटत राहू... आणि गावोगावी सावली वाटत राहू* .
आपला
सयाजी शिंदे आणि अरविंद जगताप
*सह्याद्री देवराई*
संपर्क -१)सुहास वाईंगनकर:-९४२१२९०११२
२) विजय निंबाळकर - ८२७५३६९३८३
३) धनंजय शेडबाळे - ९८२२३९४६७०
४) रघुनाथ ढोले - ९८२२२४५६४५
सौजन्य - विश्व मराठी परिषद
कृपया संकेतस्थळाला भेट द्या ही विनंती
www.vishwamarathiparishad. org